Dhrangadhra News | ધ્રાંગધ્રા પંથકમાં વધી રહેલી દારૂની બદીને ડામવા માટે સ્થાનિક તાલુકા પોલીસે સઘન કાર્યવાહી શરૂ કરી છે. તાલુકા પોલીસ મથકના ઇન્ચાર્જ પી.આઈ. એમ.બી. વિરજાની આગેવાની હેઠળની ટીમે જુદા જુદા વિસ્તારોમાં દારૂ વેચાણના અડ્ડાઓ પર દરોડા પાડ્યા હતા, જેમાં કુલ ત્રણ શખ્સો વિરુદ્ધ ગુનો નોંધવામાં આવ્યો છે.
દારૂ વેચાણ કરતા બે શખ્સો વિરુદ્ધ ગુનો
પોલીસે બાતમીના આધારે બે અલગ-અલગ સ્થળોએ દરોડા પાડી દેશી દારૂનું વેચાણ કરતા બે શખ્સોને ઝડપી પાડ્યા હતા:
ગુજરવદી ગામ: ગુજરવદી ગામમાં તળાવ પાસે આવેલી આવાવરું જગ્યા પરથી પોલીસે દરોડો પાડી 4 લિટર દેશી દારૂ (કિંમત ₹800) જપ્ત કર્યો હતો. પોલીસે આ મામલે સુભાષભાઈ ડાયાભાઇ મકવાણા (રહે: ગુજરવદી) વિરુદ્ધ ગુનો નોંધ્યો હતો.
સત્તાપર ગામ: સત્તાપર ગામથી ઘનશ્યામગઢ ગામ તરફ જવાના રસ્તા પરથી પોલીસે બાતમીના આધારે દરોડો કરી 3 લિટર દેશી દારૂ (કિંમત ₹600) જપ્ત કર્યો હતો. આ ગુનામાં રણછોડભાઈ ગેલાભાઈ ગોત્રકિયા (રહે: સત્તાપર) વિરુદ્ધ કાર્યવાહી હાથ ધરાઈ છે.
નશાની હાલતમાં એક શખ્સ ઝડપાયો
આ ઉપરાંત, પોલીસે ધ્રાંગધ્રાના સેવા સદન નજીકથી કિશનભાઇ શંકરભાઈ સોલંકી (રહે: વસાડવા) ને નશાની હાલતમાં ઝડપી પાડ્યો હતો અને તેની વિરુદ્ધ પણ કાયદેસરની કાર્યવાહી હાથ ધરી હતી.
પોલીસે દારૂબંધીના કાયદાનું ઉલ્લંઘન કરનારાઓ સામે ઝુંબેશ ચાલુ રાખવાની ખાતરી આપી છે.
